سيدي تاتا و دولة قردستان

الشّرارة

المسألة معادش مسألة لائكيّة ولّات مسألة أزمة هويّة، حكّ راسك و عاود إكتب التّاريخ و إختار منّو إلّي يعجبك و الباقي في الزّبلة، إتفرّج في المرآية إتمعشق في طلعتك البهيّة و قول إش يا ذبّانة ما فمّا في برّ تونس كان أنا و خوذ الميكرو و إبدى أخطب في خلق ربّي، أسياد تاتا إلّي حاشتهم بفكرك الوقاد و بصيرتك النّيرة و ثقافتك متاع التفّاح و النّفّاح و القوارص عصباح، هاك الكمشة نعاج الّي حاشتهم إب كبش بقرونو باش يقودهم، هاكلّي ماتو باش تجي سيادتك تنوّرهم و تحلّلهم عينيهم و إتسرحلهم وذنيهم خاترهم على نيّة ربّي، سامحوني راهم غلطوني، ما حقنيش نقول نيّة ربّي، خاطر فمّا آش كون ما يمّنش إب ربّي، و فمّا اللّي إقول إنّو نيتي نيّة الشّيطان، و باش لا يتغشّوا لا جماعة ليمين لا جماعة ليسار خمّمت نكتب من فوق إلّوطى أما خفت لا إقولو خطاب نخبوي و متسلّط، ولّا نكتب مالّوطى إلفوق، أما خفت إقولولي جاي ملّوطى لازم مندس تجمّعي ولا إتحب إتولّي إلفوق و إتخلّينا إلّوطا

دار لقمان مزّالت على حالها إلّي إحب يعمل فيلم على حمّام النساء و بولحية و مشكلة المرأة في العهد البيزنطي... بالعربي على "صرّتو"، يلقى الدّعم و التّمويل و إتجيه التلافز إتصور و تتحلّو البيبان و تتفرشلو الزّرابي البنفسجيّة

و اللّي إحب يصوّر المرمّاجي و البطّال و الجّيعان و الزّطّال و اللّي ماعندوش باش يداوي و الطّالب اللّي عايش علا كسكروتات الهريسة و السردينة و ماعندوش حق فرملي و كابوسان واللّي شهريتو يخلّص بيها حق ركوبو و فطورو عمرو أربعين كاص مزّال عازب على خاطر ماعندوش حق تاكسي للبحيرة و باش يخلّص حق قهوة إلزميلتو في البحيرة، و بو العايلة اللّى يلهط ما يخلط غارق في الدّيون للعنكوش واللّي كي إطيح لفرنك في يدّو إخبّيه موش باش يعمل حجّة ولا رحلة للمرّوك ولا تركيا ولا باش إزهّز بنتو مالصغرة كي ناس بكري، و لا باش يشري شنشونة لأمّو في عيد الأمهات و دبوزة قوارص للمدام في عيد الحب، أما خاطر دخول المكتب عدّك بيه، و سيدي رمظان عدّك بيه، و العيد لكبير عدّك بيه و الزبلة و الخرّوبة عدّك بيها، و فاتورة الظو عدّك بيها، و كمبيال باطام عدّك بيه، هاك المواطن إلّي كي إشوف يوميّة يلعن الشّيطان خاطر يشوف فيها فاتورة هاك إلّي ما إحبّش السّنة الكبيسة خاطر فيها نهار مصروف زايد، إلخ إلخ إلخ،

و بالمختصر،اللّي يحب يعمل فيلم على التّونسي و لتونسي ، إترصّيلو إدادي سكريبت تحت ظبّوطو من إدارة ليدارة و من بيرو إل بيرو يا كريم متاع اللّه، لواه هذا الكلّ ، المواطن العادي ما إشرّفش، وجهو موش سياحي، مصيرو يعاني و كي يجي يتفرّج على فيلم تونسي منّو فيه يحطّولو فيلم على مشاكل دولة ظبّوط القردة، علاه قصّة التونسي مصيرها ظبّوط مخرج شاب حبّ يحكي على عايلتو و جيرانو و حومتو و دشرتو ... ياخي دخّلوه ملباب خرجوه ملخوخة! تقولشي عليه واحد حب يشري مراية باش يشوف روحو باعولو بوستار شيقيفارى ولا عمرو خالد ولا مهنّد! ياخويا إنحب فيلم على ريحة الصّنان و الحلبة في الكار الصفّرة وروايح الزيت المحروق في حوانت الكفتاجي و العباد إلّي شاهية إتشم ريحة ورقة بو ثلاثين و روايح الزّبلة في الصيف و روايح لمعامل و ريحة الهرقمة و ريحة الفطاير و ريحة الملوخية و ريحة بابور القاز، و ريحة فم واحد جيعان ... خاطر و بكل صراحة أغلبيّة الأفلام التوانسة عملو الرّيحة ، يزّيونا من الوهابيّة ، جماعة إبن الوهّاب ولا جماعة هيفا وهبي!

و نحكي على السينيما في المطلق، خاطر اليوم كثرو السنيمائين، جماعة النقابة تعمل في السّينيما، جماعة النساء الديموقراطيّات و داء على لونك، جماعة فزّ قوم، الجماعة اللّي تقدّم بالتّوالي، جماعة التجديد و إحياء التراث، جماعة المبادرة متاع الشعب الرّآسة لحمّام سوسة، جماعة ميز مزماز تجمعي باز، حكومة مانيش باطي صبّلي كاس تاي بالبندق، قناة نسمة الحرّية من مصب ليهوديّة، قناة متحف باردو، قناة الهندي المقشّر، جمعية قاضي الغرام في عهد المخلوع عزّام، نقابة البانديّة فرع علي شورّب، نقابة كرتوش القنّاصة فسية بصّاصة ... و الليسته أطول من فترة رئاسة المخلوع

و كيف عادة السينيما التونسيّة الدّعم و الميكروات و الكاميرات ماشية للّي يستوردو في خطابهم من دولة ظبّوط قردستان و الّي إحب يحكي على لبلاد و ريحة لبلاد إ ترصّيلو برنامجو تحت ظبّوطو يساسي بيه، أما المرّة هاذي دوّيو، التمويل الرّسمي موش مالإدارات و البيروات أما من عند سيدي تاتا هاكلّي أعمل روحو درويش باش يعيش و كي فكولو خبزتو فكّلهم الكرسي !

و سيدي تاتا آش ناقصو باش ما ياخوش دور البطولة؟ تبارك الله عليه عدّى كاستينغ نهار 14 جانفي ولا أروع علاش يقعد فرايجي ؟

سيدي تاتا لاهو إسلامي و لاهو ملحد، سيدي تاتا يصلّي و خوه يسكر و جارتو حاطة فولارة و مرتو عاملة الماش و ولد عمّو شدّ الحبس في جرّت شاك و عمّو حاج و ولد خالو حارق و ولد عمتو مدير بانكة و ولدو بطّال و بنتو في الفاك و إتلوّج على بلاصة في مبيت ، و الأهمّ سيدي تاتا هو التّونسي إلّي على خاطرو فمّا حكومة و برلمان و إنتخابات، سيدي تاتا إحب دولة كيفو و ما إحبّش دولة ظبوط قردستان !